No comments yet

IGIHAGARARO CYAWE IMBERE Y’ABANTU GIKWIYE KWEREKANA/ KUBAHISHA IMANA IYO MUZIRANYE KOKO.

Kumenyana bibaho hagati y’abantu iyo umwe azi neza undi, n’uwo wundi akamenya mugenzi. Aha iyo tuvuze Imana yo, izi buri wese kuva ataraba urusoro munda nya nyina. (Yeremiya 1:5. “Nakumenye ntarakurema mu nda ya nyoko kandi nakwejeje utaravuka, ngushyiriraho kuba umuhanuzi uhanurira amahanga.”)

Ahangaha Imana yabwiye Yeremiya ko imuzi neza cyane, umunyena n’Imana iyo watangiye kugenda nayo, kuko ntabajyana bataziranye nk’uko impanda itavugira ubusa ku gasozi. Hari abo Imana yahamagariye umurimo ariko bakagenda uko bishakiye, bene abo basigara bakora ibyo bibwiye gusa, Umwuka W’Imana yarabavuyeho kera baranyazwe nka Sawuli yarabonye abandi bemera kugendana nayo nka Dawidi. Mose ava muri Egiputa yanze kugenda wenyine ahubwo atumira Imana ko igenda nawe ko nawe ubwo wenyine atakwemera kugenda. Mu murimo w’Imana muri iyi minsi ya none hari abagenda kubera impapuro bakuye mu mashuri y’amadini, iyo batagendana n’Umwuka w’Imana bakunze kuzambya ibintu cyane. Kuva 33:14. Aramusubiza ati “Ubwanjye nzajyana nawe nkuruhure.” 15. Mose aramubwira ati “Ubwawe nutajyana natwe ntudukure ino.16. Ikizamenyekanya yuko jye n’ubwoko bwawe twakugiriyeho umugisha ni iki? Si uko ujyana natwe, bigatuma jye n’ubwoko bwawe dutandukanywa n’amahanga yose yo mu isi?” 17. Uwiteka abwira Mose ati “N’icyo uvuze icyo ndagikora, kuko wangiriyeho umugisha nkakumenya izina.”

Dufite isezerano ryo kugendana n’Imana:

Abaheburayo 13:5. Ntimukagire ingeso zo gukunda impiya ahubwo mujye munyurwa n’ibyo mufite, kuko ubwayo yavuze iti “Sinzagusiga na hato, kandi ntabwo nzaguhāna na hato.”

Ahangaha tubana neza uburyo ugendanye n’Imana agira ibimuranga byerekana neza koko ko ari kumwe nayo, ariyo yamuhagurikije igihe atahugurutse akurikiye abahamagawe nka Loti wagendanye na Aburahamu atarahamagawe n’ubwo atabuze ingeso nziza amwigiraho kubwo kubana n’umukiranutsi. Reka Dufate urugero rwerekana uburyo abagendana n’Imana bayigaragaza:

1Abami 17:1. Bukeye Eliya w’i Tishubi, umwe mu basuhuke b’i Galeyadi asanga Ahabu aramubwira ati “Ndahiye Uwiteka Imana ya Isirayeli ihoraho, iyo nkorera iteka, yuko nta kime cyangwa imvura bizagwa muri iyi myaka, keretse aho nzabitegekera.”

Eliya yagendana n’Imana bityo, icyo yavugaga cyasaga n’ikivuzwe n’Imana ubwayo kuko cyahitaga kiba. Ibyo Yesu yabibwiye abigishwa ko nabo ubwabo bagize kwizera gusa babwira imisozi ikimuka bigakunda.

 Matayo 17:20. Arabasubiza ati “Ni ukwizera kwanyu guke: ndababwira ukuri yuko mwaba mufite kwizera kungana n’akabuto ka sinapi, mwabwira uyu musozi muti ‘Va hano ujye hirya’ wahava, kandi ntakizabananira.

Abigishwa ba Yesu bakiri kumwe nawe, bigaagara ko bari batarasobanukirwa neza ko umugaragu aba ashobora gukoresha ububasha bwa Shebuja. Ubaye uri minisitiri w’intebe cyangwa se uri inshuti ya president cyangwa umwami w’igihugu, umuntu wese ukuzi ko uziranye n’abanyababubasha arakubaha cyane kuko uba wigerera iburkuru utavunyishije. Kubana na Yesu rero, intumwa ze ntacyo zasobanukirwaga, kugeza ubwo zatakiye mu Nyanja kubera umuhengeri zizi ko nta kindi gisigaye uretse kurohama, zigatangazwa n’uko Yesu acyashye umuraba gusa amazi agatuza. Iyi myifatire y’intumwa ninayo tubona muri benshi biyitirira umurimo w’Imana muri iyi minsi yacu.

Nyamara ubwo Yesu yari amaze kugenda babonye Umwuka Wera, bashize amanga bakora ibirenze ibyo yakoze koko nk’uko yajyaga abibabwira.

Ibyakozwe n’Intumwa 3:6. Petero aramubwira ati “Ifeza n’izahabu nta byo mfite, ahubwo icyo mfite ndakiguha. Mu izina rya Yesu Kristo w’i Nazareti, haguruka ugende.”

Uru ni urugero rwiza nkatwe abakurikiye Yesu tugendeye ku butumwa bwiza twabwiwe tukizera, ko Niba uri umukozi w’Imana by’ukuri udakwiye kubura yose. Ntukabure ubutunzi bw’isi ngo ubure n’Ubw’Ijuru. NIba uhuye n’umuntu nk’uyu dufatiyeho urugero muhe kimwe mubyo ufite cyangwa se umuhe byose. N’ubundi dusanzwe turi mu bwami bw’Imana, tuomba gukiranuka rero kugirango tugire ibisaga( inyongera).

Ntibikwiye guhagarara imbere y’abantu ubabwiriza ibyo utanatumwe n’Imana, ahubwo kubera gusa ko aricyo wigiye mu mashuri y’amadini, abaguteze amatwi ahanini bashobora gucyura ubusa, kuko nta cyavuye ku Mana koko ubahaye. Hari n’abagerekaho kwitirira Imana ibyo itavuze gusa kubera ko baba basanzwe bazwiho ko bitwa ba “prophet” bityo akaba agomba guhora avuga ko afite ubuhanuzi. Ibi byagiye bikura abana mu gakiza mu nzira, biri mu bibabaje Imana.

None twe ab’Itorero uyu munsi tubigenze dute?

  • Dukwiye kutarumbira Imana, ntitube abo guhagarara gusa mu mazina abantu bagenda baduha, rimwe na rimwe y’ibyubahiro nyamara bitagize icyo bimariye Imana. Twaremewe guhimbaza Imana, ndetse n’igitangaza cyose cyagiye kibaho cyabaga kigamije kwerekana Imbaraga z’Imana n’icyubahiro cyayo mwasoma igice cya 17 hariya twasomye ibya Eliya.
  • Ntibikwiye na rimwe ko tubura icyo dutanga mu by’Imana yaduhaye ubwo twakiraga ubutumwa bwiza, ni ubutunzi dufite kandi bidasaza tudashobora kunyagwa, dukwiriye kugira icyo duhaho abataramenya Imana, ndetse no guhgura benedata bateshutse gato.
  • Petero na Eliya ntibagihari natwe Imana yaratumenye niba tuyizi igendana natwe, iyo ngeze ku irembo ryitwa ryiza nkabura impiya mbigenza nte? Aha sinaba nkikira nkanyura aho ntahurira n’abanyabibazo cyane ko mba nsobanukiwe n’umuryango bategererezaho? Twisuzume niba koko Imana tuvuga dutanga ubuhamya ko yaduhaye agakiza, yaba ikigendana natwe kuri uyu munsi. Umuririmbyi umwe ‘Sinzibagirwa igihe nakizwaga ubwo Yesu yinjiraga muri njye none mu mutima wanjye huzuye ishimwe nshimira umukiza wanjye….”

Nshoje ngirango twongere twishyire ku gipimo turebe ko igihagarararo cyacu, uko tuzwi mu bantu, ariko tubayeho tuzwi n’Imana koko.

Ibihe byiza.

Post a comment